देशभर एचपीभी खोप अभियान सुरु, १६ लाखभन्दा बढी किशोरी लक्षित

आजदेखि देशभर पाठेघरको मुखको क्यान्सरविरुद्धको निःशुल्क एचपीभी (ह्युमन प्यापिलोमा भाइरस) खोप अभियान सुरु भएको छ।

प्रधानमन्त्री केपी शर्मा ओलीले बालुवाटारस्थित शिवपुरी उच्च मावि खोप केन्द्रमा खटिएका काठमाडौं महानगरपालिका वडा नम्बर ३ का स्वास्थ्यकर्मीलाई स्वास्थ्य सामग्री हस्तान्तरण गर्दै अभियानको औपचारिक शुभारम्भ गर्नुभएको हो।

यो अभियान आजदेखि फागुन ६ गतेसम्म देशभर एकैसाथ सञ्चालन हुनेछ। अभियानअन्तर्गत विद्यालयमा अध्ययनरत कक्षा ६ देखि १० सम्मका छात्रा तथा विद्यालय बाहिर रहेका १० देखि १४ वर्ष उमेर समूहका १६ लाख ८८ हजार ७६८ जना किशोरीलाई यो खोप प्रदान गर्ने लक्ष्य राखिएको छ।

स्वास्थ्य तथा जनसंख्या मन्त्रालयले एचपीभी खोप सुरक्षित, प्रभावकारी र आवश्यक रहेको बताउँदै लक्षित किशोरीहरूले ढुक्क भएर खोप लगाउन आग्रह गरेको छ। मन्त्रालयले यो अभियानलाई सफल बनाउन अभिभावक, विद्यालय, स्वास्थ्यकर्मी र सम्पूर्ण समुदायलाई सहयोग गर्न अपिल गरेको छ।

एचपीभी भाइरस संक्रमण पाठेघरको मुखको क्यान्सरको मुख्य कारण मानिन्छ। खोपले किशोरीहरूलाई भविष्यमा हुन सक्ने यस्तो क्यान्सरबाट सुरक्षित बनाउन मद्दत गर्ने विश्वास गरिएको छ। यस अभियानलाई प्रभावकारी बनाउन सरकार, स्थानीय निकाय, स्वास्थ्य संस्थाहरू तथा शिक्षण संस्थाहरूबीच सहकार्य भइरहेको छ।