प्रधानमन्त्री ओली: ‘मेरो नातिले कागलाई तपाईं भन्छ, मलाई तिमी’
आज वसन्त पञ्चमी अर्थात् सरस्वती पूजा। प्रत्येक वर्ष माघ शुक्ल पञ्चमीका दिन मनाइने यस पर्वमा विद्याकी अधिष्ठान देवी सरस्वतीको पूजा गरिन्छ। विभिन्न विद्यालयले विविध कार्यक्रमसहित यो पर्व मनाइरहेका छन्।
यसै अवसरमा सम्माननीय प्रधानमन्त्री केपी शर्मा ओली काठमाडौंको बुढानीलकण्ठस्थित इम्पेरियल कलेजमा आयोजित युवा विद्यार्थीहरूसँगको अन्तरक्रियामा सहभागी हुनुभयो। कार्यक्रममा प्रधानमन्त्री ओलीले विद्यार्थीहरूसँग आफ्ना अनुभवहरू साझा गर्दै विभिन्न सन्देश प्रदान गर्नुभयो।
कार्यक्रमका क्रममा प्रधानमन्त्री ओलीले आफ्नो नातिको रोचक उदाहरण दिँदै भाषा प्रयोगको महत्त्वबारे प्रकाश पार्नुभयो। उहाँले भन्नुभयो, ‘मेरो सानो नाति छ। उसलाई भाषाको राम्रो ज्ञान छैन। काग करायो भने उसले भन्छ - "कागलाई तपाईं भन्नुपर्छ"। तर मलाई भने "तिमी" भन्छ।उसलाई बुझ्ने बेला भएको छैन, तर सिकाइ आवश्यक छ।’
प्रधानमन्त्री ओलीले नेपाली भाषाको विविधता उल्लेख गर्दै भन्नुभयो, ‘हाम्रो भाषामा तँ, तिमी, तपाईं, हजुरजस्ता सम्मानजनक शब्दहरू छन्। आमाबुवालाई तपाईं भनिन्छ, हजुरबुवा गुरुबालाई तपाईं भनिन्छ, आफूभन्दा साना व्यक्तिलाई तिमी भन्न सकिन्छ। हाम्रो भाषा सम्पन्न छ, यसलाई जोगाउनुपर्छ।’
युवाहरूलाई सही मार्गदर्शनको सन्देश
अन्तक्रियाका क्रममा प्रधानमन्त्री ओलीले युवाहरूलाई सही बाटो अपनाउन आग्रह गर्नुभयो। उहाँले गलत संगतले नकारात्मक प्रभाव पार्ने भन्दै उदाहरण स्वरूप मौरी र झिंगाको तुलना गर्नुभयो।
‘झिंगाको संगत गर्दा फोहोरको डंगुरमा पुगिन्छ, मौरीको संगत गर्दा फूलबारीमा। गलत संगतमा परेमा भविष्य बिग्रन सक्छ, त्यसैले मह जम्मा गर्ने कि किटाणु भन्ने छुट्याउनुपर्छ,’ उहाँले भन्नुभयो।
उहाँले जीवनको महत्व बुझ्न आवश्यक रहेको उल्लेख गर्दै भन्नुभयो, ‘जीवन अनन्त होइन। समयको सही उपयोग गर्न सकिएन भने पछुताउनु बाहेक विकल्प रहँदैन। हरेक क्षणको सदुपयोग गर्न सिक्नुपर्छ।’
प्रधानमन्त्री ओलीको सन्देशले युवाहरूलाई सकारात्मक सोच्न, सही निर्णय लिन र आफ्नो भाषा-संस्कृतिको सम्मान गर्न प्रेरित गर्ने विश्वास गरिएको छ।
