गोलन्जोरका विद्यालयमा शैक्षिक सामग्री तथा न्यानो कपडा वितरण
ब्याक टु लाइफ ई भी जर्मनीको आर्थिक सहयोग र सिएसडिएस सिन्धुलीको साझेदारीमा गोलन्जोर गाउँपालिका वार्ड नम्बर ४ आरुबोटेस्थित श्री प्राथमिक विद्यालय ट्वाङ्ट्वाङे र वार्ड नम्बर ३ मुर्किबेसीस्थित कुशेश्वरी प्राथमिक विद्यालयमा अध्ययनरत बालबालिकाहरूलाई न्यानो कपडाहरु ज्याकेट र टोपी तथा शैक्षिक सामग्रीहरु कापी, कलम आदि वितरण गरिएको छ। कार्यक्रममा पालिका अध्यक्ष शंकरराज बराल र सम्बन्धित वडाका अध्यक्षहरूको उपस्थिति रहेको थियो।
कार्यक्रममा ब्याक टु लाइफका डिकेन्द्र ढकालले शिक्षाको लागि आवश्यक आधारभूत स्रोत साधनले बालबालिकाको सिकाइमा पार्ने महत्त्वपूर्ण प्रभावबारे चर्चा गर्नुभएको थियो। साथै, उहाँले गोलन्जोर गाउँपालिकामा ब्याक टु लाइफले सञ्चालन गरिरहेका र निकट भविष्यमा सञ्चालन हुने विभिन्न योजनाहरूको जानकारी पनि प्रस्तुत समेत गर्नुभएको थियो।
गोलन्जोर गाउँपालिकाका अध्यक्ष शंकरराज बरालले कार्यक्रमलाई सम्बोधन गर्दै ब्याक टु लाइफले पालिकामा खानेपानी योजना, पालिका स्तरीय अस्पताल, स्वास्थ्य चौकी, र विद्यालय भवन निर्माणको प्रयासप्रति आभार व्यक्त गर्नुभयो। उनले सम्पूर्ण गोलन्जोरवासी समुदायको तर्फबाट दातृ संस्था ब्याक टु लाइफ र साझेदार संस्था सिएसडिएसलाई धन्यवाद व्यक्त गर्नुभयो। 
वार्ड नम्बर ३ का अध्यक्ष कृष्णप्रसाद पोखरेलले ब्याक टु लाइफको पहलले गाउँपालिकाको स्वास्थ्य, शिक्षा, र खानेपानीका क्षेत्रमा ठूलो योगदान पुर्याएको उल्लेख गर्नुभया। उहाँले निर्माण भएका संरचनाहरूको उचित संरक्षण र व्यवस्थापनमा सबै सरोकारवालाहरूले एकजुट भएर काम गर्नुपर्ने आवश्यकता औंल्याउनुभयो। साथै, बालबालिकालाई नियमित विद्यालयमा उपस्थित गराउन अभिभावकहरूको सक्रिय सहभागिता आवश्यक रहेको कुरामा जोड दिनुभयो।
ब्याक टु लाइफ ई भी जर्मनीकै आर्थिक सहयोगमा दुबै विद्यालयहरु श्री प्राथमिक विद्यालय ट्वाङ्ट्वाङे र कुशेश्वरी प्राथमिक विद्यालय मुर्किबेसीमा चार कोठे पक्की शैक्षिक भवन निर्माण भइरहेको छ। स्थानीय साझेदार संस्था सिएसडिएसका अनुसार आगामी शैक्षिक सत्रदेखि यी भवनहरूबाट पठनपाठन सञ्चालन गर्ने लक्ष्य राखिएको छ।