“सुरक्षित सिकाई” रचनात्मक प्रतियोगितामा “आमाको स्नेह” उत्कृष्ट कथा
काठमाण्डौ, १७ कार्तिक– सुरक्षित सिकाई परियोजना अन्तर्गत एस्डिजी स्टुडियोद्वारा आयोजित रचनात्मक प्रतियोगिता २०७७ को नतिजा सार्वजनिक भएको छ ।
रचनात्मक प्रतियोगिताका पा“च बिधामध्ये लेखतर्फ दुर्गालाल केसीको सुरक्षित बालापनमा सुन्दर सिकाई कसरी ?, कथातर्फ डा. सम्पदा भट्टराईको आमाको स्नेह, कवितातर्फ तारानाथ पराजुलीको कर्णधार, गीततर्फ यज्ञराज जोशीको छाउगोठ र चित्रकला वा हस्तकलामा उजेली सुनारको समानताको समाज शिर्षकका रचना उत्कृष्ट भएका हुन् । सम्पूर्ण विजेताहरुलाई प्रोत्साहन स्वरुप नगद रु. १० हजार, प्रमाण पत्र र मायाको चिनो प्रदान गरिने भएको छ ।
युवाहरुको प्रतिभा प्रस्फुटन, क्षमता अभिवृद्धि र हौसला प्रदान गर्नुका साथै युवाहरुलाई कोरोना भाइसको महामारीको अवस्थामा पनि सुरक्षित सिकाई वातावरणको महत्व र बुझाइबारे सक्रिय राख्न प्रतियोगिता आयोजना गरिएको थियो । कविता, गीत, कथा, लेख र चित्र तथा हस्तकलाको लागि १५० जनाले रचना पठाएका थिए । उपलब्ध रचनाहरुमध्ये हरेक विधाबाट उत्कृष्ट ५÷५ जना छनोट गरी पुनः प्रतिस्पर्धा गराइएको आयोजक एस्डिजी स्टुडियोका कार्यक्रम व्यवस्थापक निरज न्यौपानेले जानकारी दिए ।
प्रतियोगितामा सहभागीले आफ्नो घर, विद्यालय, र समाजमा सुरक्षित वातावरणको परिकल्पना र बालबालिकाहरु वा किशोरकिशोरीमाथि हुने हिंशा वा दुव्र्यवहारबाट सुरक्षित रहन सकिने चेतनामुलक रचनाहरुमा केन्द्रित हुनुपर्ने नियम थियो ।
यसका साथै भिडियो वा फिल्ममा रुची भएका २० जना युवाहरु छनोट गरी ३ दिने छोटो फिल्म निर्माण सम्बन्धी तालिम आयोजना गरिएको थियो । तालिम पश्चात ‘सुरक्षित सिकाई’ अन्तर्गत छोटो फिल्म प्रतियोगिता पनि संचालन गरिएको थियो । उक्त प्रतियोगितामा ११ वटा छोटो फिल्महरु बीच प्रतिस्पर्धा गरिएको थियो । छोटो फिल्मको मूल्यांकन निर्णायक समितिले ७० प्रतिशत र सामाजिक संजालमा आएको सेयर र भिडियो हेरेको संख्याको आधारमा ३० प्रतिशत मूल्यांकन गरिएको थियो ।
उक्त प्रतियोगितामा कुलराज चौधरी र निर्मला चौधरीको ‘रोशनीको कथा’ शिर्षकको छोटो फिल्म प्रथम, जेस ठकुरीको ‘उज्यालो भविष्य’ शिर्षकको फिल्म दोस्रो र सुनिल भण्डारी र खिमा खातीको ‘छाउ–पछाडि’ शिर्षकको फिल्म तेस्रो भएका छन् । फिल्मका विजेतामध्ये प्रथमलाई २० हजार, दोस्रोलाई १५ हजार र तेस्रोलाई ८ हजार नगद् पुरस्कार प्रदान गरिने न्यौपानेले जानकारी दिएका छन् ।
