काठमाडौं महानगरपालिकाको छात्रवृत्ति परीक्षाको प्रवेश पत्र अनलाइनबाटै प्राप्त हुने

काठमाडौं महानगरपालिकाले कक्षा ११ को लागि सञ्चालन गर्ने छात्रवृत्ति परीक्षाको प्रवेश पत्र अनलाइनबाटै प्राप्त गर्न सकिने भएको छ । काठमाडौं महानगरपालिका यस बर्ष बाट निजि विद्यालयहरुको छात्रवृत्ति परीक्षा एकिकृत परिक्षा सञ्चालन गर्न लागेको हो ।
आगामि २० गते हुने छात्रवृत्ति परीक्षाको प्रवेश पत्र अनलाइनबाटै प्राप्त गर्न यहाँ क्लिक गरे पछि खुल्ने पेजमा रहेको Check Your Status लेखिएको ठाउँ भेटिन्छ । यसमा थिचेपछि केही विवरण भर्ने फारामको पेज आउँछ । यसमा लेभल, विषय (प्रोग्राम), एसईईमा प्राप्त गरेको जीपीए, जन्म मिति र एसईईको सिम्बोल नम्बर भरेपछि प्रवेश पत्रको पेज खुल्छ । प्रवेश पत्रमा विद्यार्थीको परीक्षा केन्द्र, विद्यार्थीले उत्तर कसरी लेख्नेलगायत विवरण छन् । यसलाई डाउनलोड गरेर परीक्षा दिन आउँदा यही प्रवेश पत्र लिएर आउनु पर्ने महानगरले जनाएको छ ।

परीक्षामा कक्षा १० को पाठ्यक्रममा आधारित अनिवार्य गणित, विज्ञान, अंग्रेजी विषयबाट ३०/३० प्रश्न र सामान्य ज्ञानबाट १० वटा प्रश्न सोधिनेछन् । उत्तीर्ण हुन न्युनतम ४० प्रतिशत अङ्क प्राप्त गर्नुपर्छ । गलत उत्तरका लागि नेगेटिभ मार्किङ (नेगेटिभ मार्किङ्) नहुने महानगरले जनाएको छ ।

यि हुन परिक्षा केन्द्र

कक्षा ११ को छात्रवृत्ति परिक्षा सञ्चालनका लागि १५ वटा परीक्षा केन्द्र तोकिएको छ । महानगरले भानु मा. वि. पानीपोखरी, विश्व निकेतन मा. वि. त्रिपुरेश्वर, ज्ञानोदय मा. वि. बाफल, जनप्रभात मा. वि., कालीमाटी, जनकल्याण मा. वि. बौद्ध, कन्या विद्या मन्दिर क्षेत्रपाटी, कुलेश्वर मा. वि. कुलेश्वरमा परीक्षा केन्द्र तोकेको हाे ।

यस्तै पद्मकन्या विद्याश्रम मा. वि., डिल्लीबजार, पद्मोदय मा. वि. रामशाहपथ, पशुपति मित्र मा. वि. चावहिल, रत्नराज्य मा. वि. बानेश्वर, सहिद शुक्र मा. वि. बागबजार, संस्कृति मा. वि. रानीपोखरी, शान्ति शिक्षा मन्दिर मा. वि. ठँहिटी, सिद्धेश्वर मा. वि. शान्तिनगर ताेकिएका छन् ।

काठमाडौं महानगरपालिकामा छात्रावृत्तीकाे लागि परीक्षा दिने विद्यार्थीको संख्या ६ हजार १७ जना रहेको जनाइएकाे छ । यसमध्ये सबैभन्दा धेरै विज्ञान विषयका लागि ४ हजार १५५ जना छन् । त्यसपछि व्यवस्थापनमा १ हजार ४८४ जना र प्राविधिक विषयका लागि २४५ जना छन् । सबैभन्दा थोरै मानविकी विषयका लागि १८ जना छन् । शिक्षा विषयका लागि २६ जना र कानुन विषयका लागि ८९ जना विद्यार्थी छन् । यी ३ वटै विषयका विद्यार्थीहरुको परीक्षा केन्द्र कुलेश्वर मा. वि., कुलेश्वरमा राखिएको छ ।